ఇప్పటి వరకు ఎన్నో వివాహాలు చూసింటారు.. లవ్ మ్యారేజ్, అరేంజ్డ్ మ్యారేజ్, స్వలింగ వివాహం.. వంటి వివాహాల గురించి వినుంటారు. కానీ ఇలాంటి వివాహం గురించి ఎప్పుడూ వినుండరు.. అదే ‘స్వీయ వివాహం’.. తనను తానే పెళ్లి చేసుకోవడం.. త్వరలో ఈ పెళ్లి తంతును ముగింజేందుకు సర్వం సిద్ధం చేసుకుంది ఓ గుజరాతీ యువతి.. జూన్ 11న ఈ ‘సోలోగమీ’ చేసుకోబోతోంది..!
గుజరాత్ లోని వడోదరకు చెందిన క్షమ బిందు 24 ఏళ్ల అనే యువతి సోలోగమీ వివాహం చేసుకోవాలని నిర్ణయించుకుంది. అంతేకాదు ఈ వివాహానికి కొత్త నిర్వచనాన్ని ఇస్తోంది ఈ యువతి. స్వీయ వివాహం అంటే నీ కోసం నీవు కట్టుబడి ఉండడం.. నీపై నీకు అవధుల్లేని స్వచ్ఛమైన ప్రేమ ఉండడం.. అని చెబుతోంది.
ఇక ఈ పెళ్లిని సంప్రదాయబద్ధంగా జరుపుతున్నారు. బంధువులు, అతిథుల సమక్షంలో ఈ పెళ్లి జరగనుంది. నుదటిపై సింధూర లేపనం, ఏడడుగులు నడవడం అన్ని ఉంటాయి. అక్కడ లేనిది కేవలం వరుడు మాత్రమే.. అంతేకాదు పెళ్లి తర్వాత రెండు వారాల పాటు గోవాకు హనీమూన్ కి కూడా వెళ్లనున్నట్లు క్షమ బిందు తెలిపింది.
ఇక ఈ వివాహానికి తన కుటుంబం కూడా అంగీకరించిందని బిందు చెబుతోంది. సోలోగమీ గురించి ఇంటర్నెట్ లో వెతికానని, విదేశాల్లో కొన్ని చోట్ల కనిపించాయని, కానీ ఇండియాలో మాత్రం ఇదే మొదటిదని వివరించింది. ఈ పెళ్లి విషయంలో తనపై విమర్శలు రావచ్చని, అయితే అవేమీ తాను పట్టించుకోనని చెప్పింది.