లాక్ డౌన్ నేపథ్యంలో ఏపీ ప్రభుత్వం పేదలకు మూడో విడత రేషన్ పంపిణీ చేయనుంది. సీఎం జగన్ ఆదేశాల మేరకు మూడో విడత రేషన్ పంపిణీకి అధికారులు ఏర్పాట్లు చేశారు. అయితే సరకులు ఎలా ఇవ్వాలి..ఏ సరకులు ఇవ్వాలి..సోషల్ డిస్టెన్స్ ఏ విధంగా పాటించాలి..అనే అంశాలపై రెవెన్యూ అధికారులకు, డీలర్లకు పౌరసరఫరాల శాఖ ఎక్స్ అఫిషియో కార్యదర్శి కోన శశిధర్ మార్గదర్శకాలు జారీ చేశారు.
- బియ్యం కార్డు దారులకు ఈ నెల 29 నుంచి మే 10వ తేదీ వరకు రేషన్ దుకాణాల ద్వారా ఉచిత సరుకుల పంపిణీ చేస్తారు.
- కరోనా నిబంధనల మేరకు భౌతికదూరం పాటిస్తూ రేషన్ తీసుకునేలా చర్యలు తీసుకున్నారు.
- టైం స్లాట్ టోకెన్ లతో ఒక్కో షాపులో రోజుకు 30 మందికే సరుకుల పంపిణీ ఉంటుంది.
- మొదటి, రెండు విడతల్లో వీఆర్వో లేదా ఇతర అధికారుల బయో మెట్రిక్ ద్వారానే రేషన్ అందించారు..అయితే ఈసారి మాత్రం లబ్దిదారుల బయోమెట్రిక్ తప్పనిసరి చేశారు.
- కరోనా జాగ్రత్తల్లో భాగంగా అన్ని రేషన్ షాపుల వద్ద శానిటైజర్ వాడాలి. మాస్కులు తప్పనిసరిగా ధరించాలి.
- ప్రతి లబ్దిదారుడు బయోమెట్రిక్ ఉపయోగించే ముందు శానిటైజర్తో చేతులు శుభ్రం చేసుకునేలా డీలర్లు జాగ్రత్త వహించాలి.