ప్రస్తుతం సైబర్ నేరాలు పెరిగిపోతున్నాయి. బ్యాంకింగ్ సంబంధించిన ఓటీపీలు ఎవరికీ చెప్పొదని పోలీసులు, బ్యాంకులు హెచ్చరిస్తున్నా..కొందరు సైబర్ నేరగాళ్ల వలలో చిక్కుకుంటున్నారు. దీంతో వారు ఆర్థికంగా నష్టపోతున్నారు. తాజాగా అలాంటి ఘటనే జరిగింది. ఓ వ్యక్తి మద్యం కొనగోలుకు ఆన్ లైన్ లో చెల్లింపులు చేశాడు. అతడి వద్ద నుంచి సైబర్ నేరగాళ్లు రూ.1.61 లక్షలు కాజేశారు..
ముంబైలోని చండీవాలిలో ఓ వ్యాపారవేత్త తన స్నేహితుని వద్దకు వెళ్లాడు. ఇద్దరు కలిసి మద్యం తాగుదామని డిసైడ్ అయ్యారు. మద్యం ఎలా తెచ్చుకోవాలి. ఆన్ లైన్ లో కాల్ చేసి తెప్పించుకుందామనుకున్నారు. ఇంటర్నెట్ లో మద్యం డోర్ డెలివరీ చేసే వారికోసం వెతికారు. అందులో కనిపించిన ఓ ఫోన్ నెంబర్ కు కాల్ చేశాడు.
అవతలి వ్యక్తి తాను మద్యం దుకాణంలో పని చేస్తానని, మద్యం హోం డెలివరీ చేస్తామని చెప్పాడు. అయితే దాని కోసం ముందుగా ఆన్ లైన్ లో డబ్బులు చెల్లించాలని చెప్పాడు. అందుకు ఆ వ్యాపారవేత్త సరే అని రూ.3 వేలు విలువైన మద్య బాటిల్ ఆర్డర్ చేశాడు. ఆన్ లైన్ లో డబ్బులు చెల్లించేందుకు తన అమెరికన్ ఎక్స్ ప్రెస్ క్రెడిట్ కార్డు వాడాడు. ఆ సమయంలో తన ఫోన్ కు ఓటీపీ వచ్చింది. అవతలి వ్యక్తి ఓటీపీ చెప్పాలని అడగగా..వెంటనే చెప్పేశాడు..వెంటనే అతని ఫోన్ కు ఒక మెసేజ్ వచ్చింది. రూ.61 వేలు డ్రా అయినట్లు ఉంది.
దీనిని చూసిన ఆ వ్యాపారవేత్త ఫోన్ లో వ్యక్తిని ప్రశ్నించగా.. ఏదో ప్రాబ్లం వచ్చినట్లు ఉంది. ఆ డబ్బులు మళ్లీ పంపిస్తానని నమ్మించాడు. ఇక మద్యం బాటిల్ కు సంబంధించిన బిల్లు కోసం మరో కార్డు ద్వారా చెల్లించాలన్నాడు. దీంతో ఆ వ్యక్తి మరో కార్డు ద్వారా పే చేయాలని చూశాడు. అయితే అప్పటికే ఆ కార్డు నుంచి రెండు విడతల్లో రూ.లక్ష కొట్టేశారు. అసలు విషయం తెలుసుకున వ్యాపార వేత్త ముంబైలోని పోవై పోలీసులకు ఫిర్యాదు చేశారు. పోలీసులు కేసు నమోదు చేసుకున్నారు.