తమిళనాడు సీఎంగా బాధ్యతలు చేపట్టిన నాటి నుంచి సీఎం స్టాలిన్ తనదైన మార్క్ చూపిస్తున్నారు. తన నిర్ణయాలతో అందరినీ ఆశ్చర్యపరుస్తున్నారు. తాజాగా ఆరో తరగతి విద్యార్థినికి సీఎం స్టాలిన్ ఫోన్ చేశారు. కరోనా కారణంగా మూతపడిన పాఠశాలలను నవంబర్ 1 నుంచి ఓపెన్ చేస్తున్నట్లు ఆ అమ్మాయికి చెప్పారు. పాఠశాలకు వెళ్లేటప్పుడు టీచర్ సూచనలు పాటించాలని, కోవిడ్ నిబంధనలకు అనుగుణంగా మాస్క్ ధరించాలని, భౌతిక దూరం పాటించాలని ఆ విద్యార్థినికి సూచించారు.
తమ పాఠశాలలు ఎప్పుడు తెరుస్తారని తమిళనాడు, కర్ణాటక సరిహద్దులో ఉన్న హొసూరులోని టైటాన్ టైన్ షిప్ కు చెందిన విద్యార్థిని ప్రజ్ఞా గతంలో లేఖ రాసింది. ఆ లేఖలో తన ఫోన్ నెంబర్ రాసింది. చిన్నారి రాసిన లేఖను సీఎం స్టాలిన్ చదివి ఆ విద్యార్థినికి ఫోన్ చేసి మాట్లాడారు. సీఎం తనకు ఫోన్ చేయడాన్ని నమ్మలేకపోతున్నానని చిన్నారి ప్రజ్ఞా తెలిపింది.