నిరుద్యోగులకు జగన్ సర్కార్ గుడ్ న్యూస్ తెలిపింది. రేషన్ సరఫరా చేసే వాహనాలను వివిధ వర్గాలకు అందించేందుకు నిర్ణయం తీసుకుంది. ఎస్సీ, ఎస్టీ, బీసీ, మైనార్టీలకు రేషన్ సరఫరా ట్రక్కులను కేటాయిస్తూ నిర్ణయం తీసుకుంది. రాష్ట్రంలో మొత్తం 9 వేలకు పైగా మినీ మొబైల్ ట్రక్కులను కేటాయించింది. వాటిలో ఎస్సీ వర్గానికి 2300 కేటాయించగా, మైనార్టీలకు 600 ట్రక్కులను కేటాయించింది.
జిల్లాల జనాభా నిష్పత్తి ఆధారంగా ట్రక్కులను కేటాయిస్తూ ప్రభుత్వం ఉత్తర్వులను జారీ చేసింది. ఈ వాహనాలపై 60 శాతం సబ్సిడీ ఉంటుంది. ఎస్సీ కార్పొరేషన్ ద్వారా 30 శాతం బ్యాంక్ లోన్ లభిస్తుంది. మిగితా 10 శాతాన్ని లబ్ధిదారుల వాటాగా నిర్ణయించింది. ఒక్కో ట్రక్కు ధర రూ.5,81,190గా ఉంటుందని ప్రభుత్వం పేర్కొంది. ఈ సబ్సిడీ వాహనాల కోసం ఈనెల 20 నుంచి 27 వరకు దరఖాస్తులను స్వీకరిస్తారని, వచ్చే నెల 5న అర్హులైన లబ్ధిదారులను ఎంపిక చేస్తారని తెలుస్తోంది.