కేంద్ర ప్రభుత్వం ఆత్మ నిర్భర్ భారత్ అభియాన్ పథకం కింద ప్రకటించిన ప్యాకేజీని ఆంధ్రప్రదేశ్ లో పేదలతో పాటు ప్రతి ఒక్కరికీ లబ్ధి చేకూరేలా చర్యలు చేపట్టాలని ఏపీ సీఎస్ నీలం సాహ్ని పేర్కొన్నారు. ఆ దిశగా సంబంధిత శాఖలు కార్యచరణ ప్రణాళికలు సిద్ధం చేసి అమలుకు చర్యలు తీసుకోవాలని ఆదేశించారు. ఆర్థిక ప్యాకేజి అమలుపై సిఎస్ అధ్యక్షతన రాష్ట్ర స్థాయి కమిటి(ఎస్ఎల్సి) సమావేశం జరిగింది.
ఈ సందర్భంగా సీఎస్ మాట్లాడుతూ కేంద్రం ప్రకటించిన ఆర్థిక ఉద్దీపన ప్యాకేజీతో ఏఏ శాఖకు ఎంత మేరకు నిధులు సమకూరుతాయో అంచానా వేసి ఆ ప్రకారం వివిధ పథకాల ద్వారా ప్రజలందరికీ లబ్ధి చేకూర్చేందుకు చర్యలు చేపట్టాలని ఆయా శాఖల ముఖ్య కార్యదర్శులు, కార్యదర్శులను ఆదేశించారు. ఈ విషయంపై వచ్చే సమావేశంలో వివరంగా చర్చించేందుకు నిర్ణయించారు. ఈ లోగా ఆయా శాఖల వారీ పూర్తి సమగ్ర కార్యచరణ ప్రణాళికలను సిద్ధం చేయాలని సీఎస్ ఆదేశించారు.