సాధారణంగా బైక్స్ లేదా కార్లపై రోడ్ ట్యాక్స్ పడుతుంది. అయితే ఒక సైకిల్ పై రోడ్ ట్యాక్స్ నోటీస్ పంపించారు అధికారులు.. సైకిల్ పై భారీ మొత్తంలో రోడ్డు ట్యాక్స్ పడటంతో దాని యజమాని షాక్ అయ్యాడు. ఈ ఘటన ఉత్తరప్రదేశ్ లోని ఔరయ్యా నగరంలోని దిబియాపూర్ లో చోటుచేసుకుంది.
దిబియాపూర్ సమీపంలోని సెహుద్ గ్రామానికి చెందిన సురేష్ చంద్రకు ఓ సైకిల్ ఉంది. అయితే ఆయనకు 2014 జూన్ నుంచి 2021 సెప్టెంబర్ వరకు మోటార్ వాహనాల పన్నుగా రూ.1,51,140 చెల్లించాలని నోటీసులు వచ్చాయి. అసిస్టెంట్ రీజనల్ ట్రాన్స్ పోర్ట్ ఆఫీసర్ నుంచి సెప్టెంబర్ 16న జారీ చేసిన ఈ నోటీస్ మూడు రోజుల క్రితం అందాయి.
ఈ నోటీస్ సురేష్ చంద్ర 16 ఏళ్ల కొడుకు సుధీర్ పేరిట జారీ అయింది. అయితే సుధీర్ కి అసలు సైకిలే లేదు. ఈ నోటీసులో వాహనం ఫిట్ నెస్ లకు సంబంధించిన నోట్ కూడా ఉంది. ఈ నోటీసులు చూసిన యజమాని షాక్ అయ్యాడు. తనకు ఎలాంటి వాహనం లేదని, తనకు కేవలం ఒక సైకిల్ మాత్రమే ఉందని పేర్కొన్నాడు. ఈ విషయం ఆర్టీఓ అధికారి అశోక్ కుమార్ దృష్టికి తీసుకెళ్లగా.. ఆ నోటీస్ పొరపాటున జారీ అయి ఉంటుందని చెప్పారు. ఇలా తప్పుడు నోటీసులు ఇచ్చిన వారిపై చర్యలు తీసుకుంటామాని తెలిపారు.