కేంద్ర ప్రభుత్వం యువత కోసం ఓ బంపర్ ఆఫర్ తీసుకొచ్చింది. 500 కంపెనీల్లో ఏడాది పాటు ఇంటర్న్ షిప్ చేసేందుకు యువత కోసం కొత్త పథకాన్ని ప్రకటించింది. ఇంటర్న్ షిప్ సమయంలో ప్రతి నెలా రూ.5,000 కూడా లభిస్తుంది. యువత విద్య ఉపాధికి అంతరాన్ని తగ్గించేందుకు ఈ అద్భుతమైన అవకాశాన్ని కల్పిస్తోంది. ఈ పథకం ద్వారా దాదాపు కోటి మంది లబ్ధి పొందుతారు. అయితే ఈ పథకంలో ఏడాది పూర్తి చేసిన తర్వాత ఉద్యోగానికి కేంద్రం హామీ ఇవ్వదు. కానీ, మీ కెరీర్‌ ను అత్యున్నత స్థాయికి చేరుస్తుంది. ఉపాధి అవకాశాలు బాగా పెరుగుతాయి.
www.pminternship.mca.gov.in ఆన్‌లైన్‌ పోర్టల్‌ ద్వారా ఆధార్‌ అనుసంధానంతో ఈ పోర్టల్‌ యాక్సెస్‌ చేయవచ్చు. ఈ పోర్టల్‌ 2024 అక్టోబర్‌ 12 నుంచి ఓపెన్‌ అయింది. ఈ ఇంటర్న్‌షిప్‌లో చేరిన తర్వాత రూ.6,000 వన్‌ టైమ్‌ గ్రాంట్‌, ప్రతినెలా ప్రభుత్వం రూ.4,500, కంపెనీ రూ.500 డీబీటీ ద్వారా క్రెడిట్‌ అవుతుంది. ఈ స్కీమ్‌కు 21 నుంచి 24 ఏళ్ల మధ్య ఉన్న భారతీయులు ఎవరైనా దరఖాస్తు చేసుకోవచ్చు. ఈ పథకానికి దరఖాస్తు చేసుకునేవారు టెన్త్‌, ఇంటర్‌ , బీఏ, బీకాం, బీఎస్పీ, బీబీఏ డిగ్రీ పూర్తి చేసి ఉండాలి. ఇప్పటికే ఫుల్‌ టైం ఉద్యోగం చేస్తున్నవారు అర్హులు కాదు. అదేవిధంగా ఎంబీఏ, ఎంబీబీఎస్‌ తదితర అడ్వాన్స్‌డ్‌ అర్హత సాధించినవారు కూడా అర్హులు కాదు. దరఖాస్తు చేసుకునేవారి కుటుంబ ఆదాయం ఏడాదికి రూ.8 లక్షలు మించకూడదు.
ఏం అందిస్తారంటే..
PM Internship Scheme ద్వారా సాఫ్ట్‌వేర్‌, బ్యాంకింగ్‌, ఆయిల్‌, గ్యాస్‌ అండ్‌ ఎనర్జీ, మైనింగ్‌, టెలికాం, రిటైల్‌, సిమెంట్‌, బిల్డింగ్‌ మెటీరియల్స్‌, ఫార్మాస్యూటికల్‌, ఏవియేషన్‌, మానుఫ్యాక్చరింగ్‌, అగ్రికల్చర్‌, జెమ్స్‌ జువెలరీ, ట్రావెల్‌ హాస్పిటలిటీ వంటి రంగాల్లో ఇంటర్న్‌షిప్‌ అందిస్తారు.
ఎలా ఎంపిక చేస్తారు?
PM Internship Scheme దరఖాస్తు చేసుకున్నవారికి ఆబ్జెక్టీవ్‌ టెస్ట్‌ పెడతారు. అర్హులైన వారు PM Internship కి రిజిస్టర్‌ చేసుకోవచ్చు. ఎస్సీ, ఎస్టీ, ఓబీసీ, దివ్యాంగుల వివరాలతో ఎంపిక చేస్తారు. వారి పూర్తి వివరాలు నమోదు చేయాలి. ఎంపికైన వారికి వారు ఎంచుకున్న పరిశ్రమ నైపుణ్యాలు నేర్పిస్తారు. అంతేకాదు ఈ స్కీమ్‌లో అర్హులైన వారికి ప్రధాన మంత్రి జీవన్‌ జ్యోతి బీమా, ప్రధాన మంత్రి సురక్ష బీమా కవరేజీ కూడా లభిస్తుంది.
ఏం పత్రాలు కావాలి?
ఆధార్‌ కార్డు, పాస్‌పోర్ట్‌ సైజ్‌ ఫోటో, విద్య అర్హత,నెటివిటీ సర్టిఫికేట్లు కావాలి. ఇందులో 5 అవకాశాల్లో ఎదైనా ఒకటి ఎంపిక చేసుకోవచ్చు. మీకు స్థానం లభించకపోతే మళ్లీ ఏడాది దరఖాస్తు చేసుకోవచ్చు. ఎంపికైతే మీ ఇమెయిల్‌కు ఆఫర్ లెట్టర్‌ వస్తుంది. లేదా అధికారిక వెబ్‌సైట్‌లో కూడా డౌన్‌లోడ్‌ చేసుకోవచ్చు.
