విడాకుల కోసం ఓ భర్త అమానవీయ చర్యకు పాల్పడ్డాడు. తన గర్భిణీ భార్యకు హెచ్ఐవీ రోగికి ఉపయోగించిన సూదితో ఇంజెక్షన్ చేశాడు. ఈ ఘటన ఉత్తరప్రదేశ్ లో చోటుచేసుకుంది. బాధితురాలి తండ్రి ఫిర్యాదుతో ఈ దారుణ ఘటన వెలుగులోకి వచ్చింది.
వివరాలు మేరకు మహేశ్ గౌతమ్ అనే వ్యక్తి అలీగఢ్ లోని ఓ ఆస్పత్రిలోని ల్యాబ్ లో టెక్నీషియన్ గా పనిచేస్తున్నాడు. మహేశ్ కి గత ఏడాది డిసెంబర్ లో ఓ యువతితో పెళ్లి జరిగింది. అయితే మహేశ్ మాత్రం ఆస్పత్రిలో పనిచేస్తున్న సహ ఉద్యోగితో అక్రమ సంబంధం పెట్టుకున్నాడు. కొన్నాళ్లకు ఈ విషయం భార్యకు తెలిసి అతడిని నిలదీసింది. అప్పటి నుంచి విడాకులు కావాలని వేధిస్తున్నాడు. దీనికి భార్య అంగీకరించలేదు.
ఈక్రమంలో ఓ హెచ్ఐవీ రోగికి ఇచ్చిన సూదితో భార్యకు ఇంజెక్షన్ చేశాడు. ఈ విషయాన్ని ఆమె తండ్రికి తెలియజేయడంతో ఆయన పోలీసులను ఆశ్రయించాడు. తన కూతురు అత్తమామలతో పాటు ఆస్పత్రి యజమాని కూడా ఈ కుట్రలో భాగస్వాములను ఫిర్యాదులో పేర్కొన్నాడు. తాను గర్భవతి అని తెలిసినప్పటి నుంచి భర్త తనకు హెచ్ఐవీ అంటించాలని చూస్తున్నాడని బాధితురాలు ఆరోపించింది. ఫిర్యాదు మేరకు పోలీసులు నిందితుడు మహేశ్, అతడి తల్లిదండ్రులు, ఆస్పత్రి యాజమాన్యంపై కేసు నమోదు చేశారు.