దేశంలో లైంగిక దాడులు, అత్యాచారాలు పెరిగిపోయాయి. వయస్సుతో సంబంధం లేకుండా చిన్నారుల నుంచి వృద్ధుల వరకు అఘాయిత్యాలు పాల్పడుతున్నారు. కొన్నిఅత్యాచార ఘటనలు దేశంలో దుమారం రేపుతున్నాయి. మరి కొన్ని అసలు వెలుగులోకి రావడం లేదు. గప్ చుప్ గా సెటిల్మెంట్ చేసుకుంటున్నారు. ఈ నేపథ్యంలో కేంద్ర హోం శాఖ కొత్త మార్గదర్శకాలను విడుదల చేసింది.
కొత్త మార్గదర్శకాలు..
- లైంగిక దాడి ఘటనలో తప్పనిసరిగా ఎఫ్ఐఆర్ నమోదు చేయాలి. ఆ నేరం పోలీస్ స్టేషన్ పరిధిలోకి రాకపోతే ‘జీరో ఎఫ్ఐఆర్’ నమోదు చేయాలి. ఒక వేళ ఎఫ్ఐఆర్ నమోదు చేయకపోతే ఆ అధికారికి శిక్ష ఉంటుంది.
- రేప్ కేసుల్లో పోలీసులు 60 రోజుల్లోగా దర్యాప్తు పూర్తి చేయాలి. దర్యాప్తులో రాష్ట్ర పోలీసులకు సహకారం అందించేందుకు ‘ఇన్వెస్టిగేషన్ ట్రాకింగ్ సిస్టమ్ ఫర్ సెక్సువల్ అఫెన్సెస్’ ఆన్ లైన్ పోర్టల్ ను కేంద్రం అందుబాటులోకి తెచ్చింది.
- మహిళలపై లైంగిక దాడి గురించి సమాచారం అందిన 24 గంటల్లోగా బాధితురాలికి వైద్య పరీక్షలు నిర్వహించేలా చర్యలు చేపట్టాలి.
- బాధితురాలి మరణ వాంగ్మూలం న్యాయాధికారి సమక్షంలో రికార్డు చేయనప్పటికీ కచ్చితంగా పరిగణనలోకి తీసుకోవాలి.
- లైంగిక దాడుల కేసుల్లో సాక్ష్యాలను సేకరించేందుకు సెక్సువల్ అసల్ట్ ఎవిడెన్స్ కలెక్షన్ కిట్లను ఉపయోగించాలి.
- లైంగిక దాడి కేసుల్లో పోలీసులు నిబంధనలను పాటించకపోతే వారిపై కూడా కఠిన చర్యలు ఉంటాయి.